Lulzim Zeneli rikthehet në LDK – përvojë politike dhe vizion për Kosovën
Prishtinë – Prof. Dr. Lulzim Zeneli është rikthyer zyrtarisht në skenën politike dhe në Lidhjen Demokratike të Kosovës, duke sjellë me vete përvojën e gjatë institucionale, politike dhe akademike të ndërtuar ndër vite në shërbim të shtetit të Kosovës.
Zeneli, i cili ishte deputet për tri mandate në Kuvendin e Kosovës dhe një nga nënshkruesit e Deklaratës së Pavarësisë, rikthehet në një kohë që po konsiderohet e rëndësishme për zhvillimet politike dhe institucionale në vend.
Ai njihet si bashkëpunëtor i afërt i ish-Presidentit historik Ibrahim Rugova dhe Akademik Nexhat Dacit, ndërsa gjatë angazhimit të tij politik ka qenë pjesë e proceseve kyçe të shtetndërtimit të Kosovës.
Pas një periudhe të gjatë të përkushtimit në jetën akademike, shkencore dhe profesionale, Prof. Dr. Zeneli rikthehet me synimin për të kontribuar në forcimin e institucioneve, kulturës demokratike dhe orientimit euroatlantik të Kosovës.
Në reagimet pas rikthimit të tij në LDK, ky veprim është cilësuar si një rikthim i përvojës dhe maturisë politike në një kohë kur vendi ka nevojë për stabilitet institucional dhe përfshirje më të madhe të ekspertizës në vendimmarrje.
Rikthimi i Lulzim Zenelit shihet gjithashtu si një mesazh për bashkimin e figurave dhe vlerave që kanë kontribuar në periudhat më të rëndësishme të historisë moderne të Kosovës.
