Ngjarjet që shënuan vitin 2025 në RMV: Tragjedi, korrupsion, pazare politike, ngecje dhe shtet që vepron vetëm nën presion

Viti 2025 në Maqedoninë e Veriut nuk do të mbahet mend për ngjarje të mira. Vendi nuk bëri ndonjë kthesë të madhe, edhe ky vit u përcoll me kriza të ndryshme. Ishte vit ku tragjeditë u përsëritën, ngecjet institucionale dolën në përsëri në sipërfaqe, lufta kundër korrupsionit dështoi, ndërsa drejtësia heshti për shumë raste. Qytetarët jetuan mes ndotjes së ajrit, mbeturinave, pasigurive, korrupsionit dhe procesit eurointegrues i cili ka ngecur. Le t’i kujtojmë nga pak të gjitha në përmbledhjen vjetore të Portalb.mk.

Që në fillim të vitit, Shkupi u rendit si qyteti me ajrin më të ndotur në Evropë, ndërsa statistikat e vdekjeve nga ndotja treguan se problemi nuk është më vetëm mjedisor, por edhe shëndetësor e institucional. Në verë, kryeqyteti u përball edhe me krizën e mbeturinave, duke u shndërruar në deponi të madhe.

Tragjeditë ishin plagë e hapur e vitit. Zjarri në diskotekën “Pulse” në Koçan, ku humbën jetën 63 persona, u bë simbol i neglizhencës dhe mungesës së kontrollit shtetëror. Ashtu si rasti i spitalit modular në Tetovë, edhe kjo tragjedi ngriti pyetjen e dhimbshme: Sa jetë duhen humbur që shteti të veprojë?

Viti 2025 e gjeti Antikorrupsionin të goditur nga brenda, me skandale që përfshinë vetë udhëheqjen e institucionit që duhej të luftonte të keqen.

Viti u shënua nga një varg vendimesh në fushën e drejtësisë që e thelluan mosbesimin e qytetarëve.

Në planin politik, 2025 ishte vit i pazareve, lëvizjeve taktike dhe krizave të brendshme.

Zgjedhjet lokale u zhvilluan në një ambient të tensionuar, me akuza, tensione etnike dhe dyshime për barazi në garë.

Procesi i integrimit evropian ngeci, as këtë vit vendi nuk arriti të hapë negociatat. Derisa shtetet fqinje po vrapojnë drejt Brukselit, RMV-ja ka ngecur në vend, pos deklaratave dhe viktimizimit, progres nuk pati.

Nga ana tjetër, raportet tjera ndërkombëtare ishin si shuplaka për vendin, RMV-ja shënoi rënie në indeksin e korrupsionit, në lirinë e mediave, në renditjet e Freedom House dhe Indeksin Global të Paqes.

Gjuha e urrejtjes dhe incidentet ndëretnike u trajtuan kryesisht në mënyrë selektive dhe të vonuar, duke e thelluar ndjenjën e pasigurisë dhe mosbesimit mes komuniteteve

Në gjitha këto ngjarje, roli i medias ishte thelbësor. Hulumtimet, raportimet gazetareske për tragjeditë, korrupsionin dhe diskriminimin, treguan se pa media kritike, shumë nga këto tema do të mbeteshin në errësirë.

Për Portalb.mk, 2025 shënoi dy momente të rëndësishme. Gazetari Fisnik Xhelili u vlerësua me çmimin vjetor të SHGM-së për raportimin më të mirë lokal dhe rajonal, ndërsa Portalb.mk u rendit sërish si portali më i besueshëm sipas anketës së IRI-t.

Viti 2025 mbyllet me shumë pikëpyetje dhe mbi të gjitha me atë se a do të vazhdojë Maqedonia e Veriut të reagojë vetëm kur ndodh tragjedia e radhës, apo do të ndërtojë më në fund institucione që parandalojnë, mbrojnë, sjellin drejtësi dhe zbatojnë reformat? Përgjigjja, si zakonisht, mbetet për vitin tjetër dhe për qytetarët që nuk po dorëzohen.

Redaksia e Portalb-it ju uron një Vit të Ri sa më të mbarë, me shumë shëndet dhe suksese!

Më poshtë kemi bërë radhitje kronologjike të ndodhive më të rëndësishme gjatë vitit 2025 në Maqedoninë e Veriut.

Janar

1 janar	Patentat e shoferit me emrin e vjetër kushtetues të shtetit u bënë të pavlefshme
5 janar	Presidentja nuk e nënshkroi dekretin e Ligjit për Mbrojtjen e Fëmijëve për shkak të dispozitave për dygjuhësinë
5 janar	U dogj vetura e gazetares së SDK-së në Ohër
6 janar	Shkupi u radhit si qyteti me ajrin më të ndotur në Evropë
8 janar	Artan Grubi u shkarkua nga Universiteti i Tetovës
12 janar	RMV-ja me më së shumti vdekje nga ndotja e ajrit
13 janar	Gordana Jankulloska u lirua nga akuza në rastin ‘Fortesa’ kurse Goran Grujevski, Toni Jakimovski, Nikolla Boshkovski dhe Valentina Simonovska u dënuan me burg
14 janar	Punëtorët e Administratës Publike në protestë, kërkuan shtesë në paga
16 janar	Ilire Dauti dha dorëheqje si kryetare e Komisionit për Politikë Sociale pas interpelancës kundër saj
18 janar	VLEN i shkeli afatet kohore për ndryshimet kushtetuese
21 janar	Maqedonia e Veriut e refuzoi kërkesën për njohjen e shtetit të Palestinës
23 janar	Trajko Veljanovski, Spiro Ristovski dhe Mile Janakievski u amnistuan dhe liruan nga prokuroria për “Organizimin e 27 Prillit”
24 janar	Kosova i dërgoi notë proteste RMV-së pasi zëvendëskryeministri serb Ivan Stoilkoviq përdori termin ’Kosova dhe Metohija’
28 janar	Kryetari i Republikës Sërpska, Millorad Dodik mbajti fjalim kundër BE-së në Shkup
29 janar	Kuvendi i RMV-së e ratifikoi Marrëveshjen me BE-në për Instrumentin për Reforma dhe Rritje
30 janar	Vdekja e 22 vjeçares Frosina Kulakova nga goditja me veturë nga Vasil Jovanov i cili nuk kishte leje të vozitjes, ishte nën efekt të alkoolit dhe kishte qenë në paraburgim

Shkurt

1 shkurt	VMRO dhe VLEN u pajtuan për mbështetje të ndërsjellë në zgjedhjet lokale
11 shkurt	RMV-ja shënoi rënie në Indeksin e Korrupsionit nga Transparency International
12 shkurt	Gjykata e Tetovës vendosi se kryetar i Aleancës për Shqiptarët është Ziadin Sela dhe se atij i takojnë vulat
12 shkurt	Gjykata Kushtetuese filloi procedurë për ndryshime në Kodin Penal
16 shkurt	Protestë për vdekjen e Frosina Kulakovës dhe viktimace tjera të trafikut
17 shkurt	Kuvendi vazhdoi me miratimin e ligjeve me procedurë të shkurtuar
24 shkurt	Agjencia për Menaxhimin e Pasurive të Sekuestruara vendosi të nxjerrë në shitje pasurinë e sekuestruar të ish-kryeministrit Nikolla Gruevski dhe ish-shefit të DSK-së, Sasho Mijalkov
26 shkurt	RMV-ja shënoi ngecje në renditjen e Freedom House
28 shkurt	U nënshkrua deklarata për themelimin e Këshillit për Bashkëpunim midis RMV-së dhe Turqisë

Mars

1 mars	RMV-ja ra nën mesataren e BE-së për nga numri i gjykatësve
2 mars	Samiti i qeverive RMV – Hungari
6 mars	Protestë kundër EVN-së për faturat e larta
8 mars	Prtoestë për 8 Mars: Një në tre gra përjeton ngacmim, kërcënime ose sulm fizik në hapsira publike
10 mars	Zjarr në hapsirat e Televizionit Koha në Tetovë
11 mars	Kuvendi votoi mosbesim për pesë anëtarë të Këshillit Gjyqësor
16 mars	Tragjedia në diskotekën Pulse në Koçan: 63 të vdekur, mbi 150 të lënduar
16 mars	Shtatë ditë zie për zjarrin në Koçan
18 mars	Filloi rigjykimi për zjarrin në Spitalin Modular në Tetovë
18 mars	Protestë për zjarrin në Koçan
23 mars	Hulumtimi i Portalb: Si u shit ish-Monopoli në Tetovë?
24 mars	RMV-ja u bë vendi i parë që i mori paratë sipas Planit të Rritjes nga BE
25 mars	U prezantua draft-raporti për RMV-në në Parlamentin Evropian
27 mars	RMV-ja shënoi 5 vjetorin e anëtarësimit në NATO

Prill

3 prill	SHBA vendosi dogana 33% ndaj RMV-së
4 prill	Takimi i shumëpërfolur i krerëve të VMRO-DPMNE dhe LSDM-së i shoqëruar me shumë dilema
4 prill	Fisnik Xhelili nga Portalb e mori çmimin vjetor të SHGM-së për raportimin më të mirë mbi tema lokale dhe rajonale
5 prill	Komiteti i Përhershëm i Asamblesë Parlamentare të NATO-s në Shkup
7 prill	Venko Filipçe u rizgjodh kryetar i LSDM-së
10 prill	Skandali kur shkelësi i vlerave të BE-së Petar Bogojeski u emërua në krye të Agjencisë Nacionale për Programe Arsimore Evropiane dhe Mobilitet
12 prill	Filloi funksionimi i një pike të përbashkët kufitare midis RMV-së dhe Kosovës në Bllacë dhe Han të Elezit
13 prill	Aleanca për Shqiptarët e Arben Taravarit doli nga koalicioni VLEN, më vonë edhe nga Qeveria
24 prill	U vendos që të ndërtohet spital komplet nga fillimi në Kërçovë, miliona euro shkuan kot
24 prill	Kryetarja e Antikorrupsionit Tatjana Dimitrovska e dyshuar për korrupsion në rastin Aditiv
27 prill	Tetë vjetori i sulmeve të përgjakshme në Kuvend
30 prill	Gjykata Kushtetuese e rrëzoi vendimin e qeverisë që BFI të hapë shkollën e mesme Medresenë “Isa Beu” në Shkup

Maj

2 maj	RMV-ja shënoi rënie në indeksin e lirisë së shtypit
7 maj	U nënshkrua marrëveshja për ndërtimin e interkonektorit të gazsjellësit RMV- Greqi
12 maj	Aleanca për Shqiptarët e Arben Taravarit kaloi në opozitë
13 maj	Vasil Jovanov u dënua me 12 vjet burg pasi përplasi për vdekje Frosina Kulakovën
16 maj	Gjykata e Tetovës e shpalli vendimin për rigjykimin e rastit të zjarrit në modular, Florin Besimi dhe Artan Etemi u dënuan me 1 vit e 6 muaj burg kurse Spitali i Tetovës me 1 milion denarë
22 maj	U nënshkrua marrëveshja midis qeverive të RMV-së dhe Britanisë për mbështetje financiare prej 6 miliardë euro
26 maj	U formua dega e tretë e Aleancës për Shqiptarët në krye me Arben Fetain
26 maj	Enver Bexheti u shkarkua nga Këshilli Gjyqësor disa muaj pasi u fut në Listën e Zezë Amerikane

Qershor

10 qershor	Kryeministri Hristijan Mickoski e kërcënoi drejtorin e Inspektoratit të Gjuhëve se nëse refuzon të flasë maqedonisht do ta shkarkojë
11 qershor	Qeveria e RMV-së i diskriminoi sportistët shqiptarë, asnjë në mesin e të dekoruarve
17 qershor	U shty për në afat të pacaktuar seanca përgaditotre për shqyrtimin e Ligjit të Përdorimit të Gjuhëve
17 qershor	Shtatë vjetori i Marrëveshjes së Prespës
19 qershor	Përleshje fizike në Komunën e Koçanit
20 qershor	Me dyer të mbyllura, Qeveria e RMV-së ndryshoi përbërjen e Komisionit historik me Greqinë
24 qershor	Komiteti i Punëve të Jashtme (AFET) në Parlamentin Evropian miratoi Raportin për Maqedoninë e Veriut
24 qershor	Pas presionit të mediave dhe BE-së, Petar Bogojeski u largua nga posti i drejtorit të Agjencisë për Programe Arsimore Evropiane
25 qershor	Gjykata i dënoi me burg të përjetshëm katër të akuzuarit për vrasjen e Vanjës, babai i saj u lirua nga akuza

Korrik 

1 korrik	U mbyll USAID, në RMV u investuan rreth 900 milionë dollarë
4 korrik	U lëshua në përdorim pika e përbashkët kufitare Tabanoc -Preshevë mes RMV-së dhe Serbisë
9 korrik	Parlamenti Europian e miratoi raportin e progresit mbi Maqedoninë e Veriut
11 korrik	U sulmua fizikisht kryetarja e Qytetit të Shkupit, Danella Arsovska
15 korrik	Pjesëtarë të grupit kriminal të Gërçecit u dënuan me mbi 50 vite burg
15 korrik	Kuvendi i RMV-së i la qytetarët pa Avokat të Popullit
21 korrik	BDI dhe Aleanca për Shqiptarët e Ziadin Selës dhe ajo e Arben Taravarit vendosën të shkojnë bashkë në zgjedhjet lokale
25 korrik	Aktivistja suedeze Greta Thunberg vizitoi Tetovën, e kritikoi Kuvendin për qëndrimin ndaj Gazës dhe mori pjesë në protestën në Doshnicë
25 korrik	Dha dorëheqje kryetarja e Antikorrupsionit, Tatjana Dimitrovska pasi Prokuroria ngriri aktakuzë kundër saj për zbulim të sekreteve zyrtare dhe falsifikim kompjuterik
26 korrik	62 vjetori i tërmetit në Shkup
29 korrik	Kuvendi i RMV-së e miratoi ligjin që e mundëson akreditimin e Medresesë “Isa Beu”
31 korrik	Faton Selami u konfirmua si propozim për Avokat të ri të Popullit në RMV

Gusht

2 gusht	122 vjetori i Kryengritjes së Ilindenit
10 gusht	Vrasja në Tetovë, një i vdekur dhe katër të lënduar mes të cilëve një vajzë e mitur
12 gusht	24 vjetori i Marrëveshjes së Ohrit
18 gusht	33 vjetori i Armatës

Shtator

1 shtator	RMV-ja ra me katër vende në Indeksin Global të Paqes
4 shtator	Delegacioni i Komisionit të Venedikut në Gjykatën Kushtetuese, kërkoi të informohet mbi shfuqizimin e “Balancuesit”
4 shtaror	Dhuna ndëretnike në Tetovë, dy nxënës shqiptarë u rrahën nga tifozët maqedonas
8 shtator	Katër vjetori i zjarrit në spitalin modular të Tetovës
8 shtator	34 vjetori i pavarësisë së RMV-së
9 shtator	Zjarri në deponinë ‘Drislla’
13 shtator	Anketa e IRI-t: Portalb vazhdon të jetë portali më i besueshëm në gjuhën shqipe në RMV
13 shtator	30 vjetori i marrëdhënieve diplomatike RMV-SHBA
30 shtator	Franca e shtyu afatin për dorëzimin e sistemeve kundërajrore për RMV-në

Tetor

4 tetor	Shkupi u shndërrua në deponi, krizë me mbeturinat
11 tetor	84 vjetori i Ditës së Kryengritjes Popullore
15 tetor	Përgjimet në Komunën e Kërçovës, në fokus Fatmir Dehari
15 tetor	Ursula von der Leyen vizitoi Shkupin
19 tetor	U mbajt rrethi i parë i zgjedhjeve lokale 2025 në RMV, gjithçka që ndodhi
31 tetor	Sulmuesi i kryetares së Qytetit të Shkupit u dënua me burg me kusht prej dy vitesh

Nëntor

2 nëntor	U mbajt rrethi i dytë i zgjedhjeve lokale, gjithçka që ndodhi
4 nëntor	U publikua Raporti i Progresit për RMV-në nga Komisioni Evropian
5 nëntor	Vdekja e Daorsa Spahijas në rrethana të paqarta në Tetovë
6 nëntor	RMV dhe Bullgaria nënshkruan marrëveshjen për ndërtimin e tunelit ndërkufitar në Korridorin 8
14 nëntor	U zbulua se janë kryer 10 operacione në zemër ose pacientë të udhëzuar gabimisht
17 nëntor	U shpallën zgjedhjet lokale për katër komuna: Gostivar, Vrapçisht, Mavrovë&Rostushë dhe Qendër&Zhupë
19 nëntor	Aleanca për Shqiptarët e Ziadin Selës doli nga koalicioni me BDI-në (AKI)
19 nëntor	Filloi gjykimi për tragjedinë e zjarrit në Koçan
22 nëntor	Shënimi i Ditës së Alfabetit Shqiptar
23 nëntor	Katër vjetori i tragjedisë së autobusit në Bullgari
24 nëntor	Gjykata Evropiane hapi lëndë për rastin “Tanku” pas ankesës së Jankulloskës
26 nëntor	Ndërroi jetë këngëtari Shpat Kasapi

Dhjetor

1 dhjetor	Filloi periudha e testimit të sistemit ‘Qyteti i Sigurt’
2 dhjetor	Adem Çuçul u zgjodh kryetar i Antikorrupsionit
3 dhjetor	Familjari i cili humbi babain dhe vëllaun në zjarrin në modular e paditi në Itali RMV-në për vrasje
6 dhjetor	Kryeministri Hristijan Mickoski u rizgjodh kryetar i VMRO-DPMNE-së
6 dhjetor	Ambasada britanike ka konfirmuar se po bashkëpunon me qeverinë e RMV-së për të trajtuar migracionin e paligjshëm
10 dhjetor	Kuvendi i RMV-së miratoi Buxhetin për vitin 2026, peshon rreth 6.7 miliardë euro
10 dhjetor	U mbajt konferenca E-shoqëri nga Fondacioni Metamorfozis
12 dhjetor	Ligji për përfaqësim të drejtë dhe adekuat u shqyrtua në seancë plenare në Komisionin e Venecias ku mori vlerësim pozitiv
13 dhjetor	Ish-ministrja e Drejtësisë u zgjodh nënkryetare e Komisionit të Venecias
13 dhjetor	Ish-prokrorja speciale Katica Janeva u lirua me kusht nga burgu
16 dhjetor	Kryeprokurori Ljubomir Kocevski dha dorëheqje pak orë para se shumica parlamentare ta shkarkonte
17 dhjetor	LSDM-ja zgjodhi udhëheqësinë e re
20 dhjetor	BDI-ja mbajti kongres, ndryshoi kryesinë qendrore
22 dhjetor	Ambasadorja e SHBA-ve në vend Angela Aggeler ëështë ndër 30 ambasadorët e tërhequr nga presidenti Donald Trump
22 dhjetor	Anita Topalova Isajllovska, e cila kërkoi që lënda kundër VMRO-së të hidhej poshtë, u zgjodh prokurore e përkohshme në vend të Kocevskit
23 dhjetor	Qeveria e Maqedonisë së Veriut shpalli gjendje krize energjetike
24 dhjetor	Përderisa s’ka vendim për fajtorët e vërtetë të zjarrit në modular, Besimit dhe Etemit iu dyfishua dënimi
29 dhjetor	Kuvendi i RMV-së e miratoi Ligjin e ri për Këshillin Gjyqësor