Autoritetet ruse të dielën u bënë thirrje banorëve të një zone në kufirin me Ukrainën që të largohen nga shtëpitë e tyre pasi bombardimet ukrainase u intensifikuan këtë javë.
Rrethi i Shebekinos në rajonin jugperëndimor të Belgorodit në kufirin me Ukrainën është goditur nga bombardimet e vazhdueshme, duke vrarë disa civilë dhe duke detyruar fshatarët të largohen.
Guvernatori i rajonit, Vyacheslav Gladkov, u bëri thirrje banorëve të bashkëpunojnë me autoritetet dhe të evakuohen nga zona, raporton themoscowtimes.
“Unë kërkoj që fshatrat, para së gjithash, rrethi Shebekino që është granatuar, të dëgjojnë pozicionin e autoriteteve dhe të largohen – të largohen përkohësisht – nga shtëpitë e tyre”, tha Gladkov në Telegram.
Ai tha se qëllimi ishte “të ruash atë që është më e rëndësishmja: jetën tënde dhe jetën e të afërmve të tu”.
Gladkov foli një ditë pasi dy gra u vranë në fshatrat kufitare nga granatimet.
Ndryshe, më shumë se 4000 njerëz nga zonat kufitare aktualisht janë të strehuar përkohësisht në rajonin e Belgorod.
