Spitali i Mitrovicës nis bashkëpunimin me shefat e reparteve, Muja premton përkrahje të plotë
Ushtruesi i detyrës së drejtorit ekzekutiv të Spitalit të Mitrovicës, dr. Leonard Muja, së bashku me u.d. drejtorin mjekësor, dr. Qenan Çabra, kanë zhvilluar një takim njohës me shefat e reparteve të këtij institucioni shëndetësor.
Gjatë takimit, Muja vlerësoi angazhimin dhe punën e stafit shëndetësor, duke premtuar bashkëpunim të ngushtë dhe mbështetje të plotë nga menaxhmenti i ri.
Ai theksoi se përmirësimi i shërbimeve shëndetësore dhe arritja e rezultateve pozitive varen nga bashkëpunimi i të gjithë stafit, përfshirë mjekët, infermierët dhe drejtuesit e reparteve.
Po ashtu, Muja vlerësoi edhe punën e menaxhmenteve të kaluara, duke bërë të ditur se do t’u kushtojë vëmendje kërkesave dhe nevojave të reparteve, me qëllim të avancimit të mëtejshëm të shërbimeve në dobi të pacientëve.
